بسم الله .. نبدأ التدوين...!!!

السلام عليكم ورحمة الله وبركاته
في الحقيقة ترددت كثيراً قبل أن أقوم بتفعيل المدونة الخاصة بي وبعد تفكير ومراجعة للنفس وتجديد النية وطبعا بعد ما زوجتي الحبيبة بقى ليها مدونة على هوامش السنين ولحقتها ماما (حماتي العزيزة) بمدونتها أم مالك وطبعا لازم يكون فيه جبهة تانية مساندة لأن الإخوة الأعداء كدا هيسطروا على الإنترنت والمدونات قلت لنفسي طيب ما أعمل المدونة أنا كمان .. :D..!!
المدونة سمتها "لُجينيات بين السطور" ويمكن إخترت الإسم دا علشان أنا ديما بحب أقرأ الي بين السطور وفي الفترة الي فاتت وفي ظل الهجمات الشرسة على ثغور الإسلام والمحاولات المستمرة لهدم الثوابت والغزو الفكري والعقائدي الذي يسير بخطى متسارعة في ظل التوتر الذي نعيش فيه في منطقة الشرق الأوسط عموما أو الوطن العربي

المدونة مش هيكون توجهها ديني بحت لأني برضه تحقيقا لرغبة بعض أصدقائي الي كانوا بيعرضوا عليا موضوع تأليف كتب في مجال تقنيات الحاسب الآلي والبرمجيات هضمنها ببعض الموضوعات التي تختص بهذا المجال وطبعا مش هنسي المستخدم المبتدئ وأظن أهم موضوع بيقلقه دايما هو صيانة الحاسب الآلي الخاص به وحماية نفسه من الفيروسات أو نصائح عامه ليه

وعشان نثبت للعالم وللعلمانيين الي ملوا بلدنا حالياً إن الإنسان المسلم ممكن يكون حاصل على أعلى الدرجات العلمية ومتعمق في دينه ويعلم فقه الواقع المعاصر ويدعوا إلى الله في نفس الوقت على منهج وخطى السلف الصالح والقرون الخيرية الثلاثة

فبالتالي أقسام المودونة إن شاء الله هتكون كالتالي

عام ---- ودا بيتكلم في موضوعات عامة أو سياسية
ديني --- ودا هيختص بالكتابات الدينية
فرق ومذاهب --- ودا هيبقي خاص بالفرق والمذاهب عموما
الشيعة --- والطائفة دي أفردتلها قسم خاص نظراً لأهمية معرفة كل شيئ عنها سواء بالسلب أو بالإيجاب
الحياة السعيده --- ودا هيكون خاص بالموضوعات عن الحياة الزوجية وكيف تسعدين زوجك وكيف تسعد زوجتك ووقفات علي حياة النبي صلي الله عليه وسلم كزوج وحبيب ورسول ومعلم وأب ومواصفات البيت المسلم
تكنولوجي --- ودا هيختص بالموضوعات التكنولوجية والبرمجيات بما فيه نصائح لمن يريد أن يسلك الطريق كمبرمج أو المستخدم العادي البسيط الي محتاج يعرف ازاي يحمي نفسه كويس وإزاي يفهم ايه الي بيحصل مع الكمبيوتر بتاعه
تعليم --- ودا هيختص بتقنيات التعليم وخاصة التعليم الإلكتروني وبما إني في إطار تجهيز مشروع متكامل عن التعليم الإلكتروني وتقنياته ويمكن لو كان عندي وقت أقدم بيها دراسة للمجاستير إن شاء الله

ويمكن يبقي في أقسام تانية ويمكن مفضاش أكتب مش عارف ...!!! بس نستعن بالله ونسأل الله عز وجل الإخلاص في العمل وأن يتقبله ويكون في ميزان الحسنات إن شاء الله يوم القيامة


وانا لسه مخلصتش تصميم المدونة بس ان شاء الله أخلصه انهارده أو بكره وياريت لو أي حد لقى مشكلة في التصفح او المدونة ظاهر عنده مهياش بصورة صحيحة يقلي عشان أتأكد من النقطة دي هو أي حد بيستعمل أي متصفح غير الإنترنت إكسبلورر هيكون عنده كويس وطبعا انا فعلت المدونة بدون علم أي حد وزوجتي الحبيبة أنا عارف إنها هتتفاجئ بالموضوع لمعرفتها بضيق وقتي الشديد ولكنها طقت في دماغي وعملت المودنة !! يعني أسيبهم كدا واخدين راحتهم طبعا ميرضكوش :D
حبيت أكتب الموضوع دا كمقدمة وفاتحة خير إن شاء الله لحياتي التدوينية

أسيبكم في رعاية الله وحفظه

أبو لجين